अभयम्

अभयं सत्त्वसंशुद्धिर्ज्ञानयोगव्यवस्थितिः।
दानं दमश्च यज्ञश्च स्वाध्यायस्तप आर्जवम्॥ 16.1॥श्लोक सुनें
१६.१

श्रीमद्भगवद्गीता में श्रीकृष्ण भॻवान 16हें अध्याय जे पहरिएं ऐं ॿिएं श्लोक में दैवी गुण ॿुधाया आहिन। अभयम्, शुद्ध सतोगुणी थियण, ज्ञान, योग, निष्ठा, दान, इन्द्रियुन जो दमन, यज्ञ करण, तप, सरलता, अहिंसा, सत्य, अक्रोध, त्याग, शांति, चुगली न करण, सभनी प्राणियुनि ते दया करण, तृष्णा खां बचण, कोमल सुभाव, चपलता जो त्याग, क्षमा, धृति, पवित्रता, द्वेष न करण, अभमान न करण इहे सब दैवी आहिन। भॻवान सब खां पहरियों पद अभयम् चयो आहे। अभयम् यानी जिते भय सफा न हुजे। भय माना डपु; डपु छाखे थो चइजे, डपु छा जो थींदो आहे? मुखां कुझ गलत न थी वञे, मुहिंजी ज़िन्दगीअ में कुझ गलत न थी वञे, मूंसां केरु धोखो न करे। इहो सब सोचे सोचे अंदर में घबराहट थींदी आहे ऐं उन खे ई डपु चइबो आहे। डप जा जुदा जुदा नमूना आहिन, जीअं त अंदर जो डपु, ॿाहिर जो डपु वगेरह।

माण्हूं जड॒हिं को पाप करे थो, कहिं ते अत्याचार करे थो, कहिं सां गलत वहंवार करे थो त उनजे अंदर में डपु पैदा थिए थो। को ब माण्हूं शास्त्रनि में मना कयल वहंवार तेसीं ताईं कंदो आहे, जेसीं ताईं उन जे मन में इहा लालच आहे त मुहिंजो सरीर ठीक रहे, मुखे मान सम्मान मिलंदो रहे, संसार जा सब भोॻ पदार्थ मिलंदा रहनि। छाकाण त हुन जो सिर्फ हिक ई उद्देश्य हूंदो आहे, संसारी जड़ शयूं हासिल करण ऐं उन्हनि जी सम्भाल करण। मतलब त हुन खे इहो डपु हमेशह रहंदो आहे त हिननि संसारी शयुनि जो नास न थी वञे ऐं इन्हीअ करे हू कड॒हिं ब बेडपो कोन थी सघंदो आहे।

पर जहिं वक्त हुनजो उद्देश्य भॻवान जी प्राप्ति, चिन्मय-तत्त्व जी प्राप्ति थी वेंदो आहे, उन्हीअ वक्त खां ई पाप, अत्याचार, अन्याय, गलत वहंवार सभेई छुटी वेंदा आहिन। हकीकत में इहो उद्देश्य त पहरीं खां ई ठहियल आहे; उनखां पोइ ई असांखे हीउ सरीर मिलियो आहे, इनलाए उन उद्देश्य खे सिर्फ सुञाणणो आहे, ठहियल त पहरीं खां आहे।

ॿाहिरां अचण वारो डपु छा खे थो चइजे? जीअं त चोरनि, डाकुनि, शीहं, नांग, विछूंअ वगेरह प्राणियुनि खां जेको डपु थिए थो इहो ॿाहिर जो डपु आहे,जहिं में सरीर जे नास थियण जो इम्कान हुजे। कहिं मिट माइट, दोस्त सां रिश्तो टुटण जो डपु ब ॿाहिर जो डपु चइबो। हिन में माण्हूं हुननि सभनी जूं सब ॻाल्हियूं, भले उहे सही नीतीअ वारियूं न हुजनि, यानी मञण जहिड़ियूं न हुजनि,तड॒हिं ब मञींदो आहे, डप जे करे। हिक ॿिए नमूने जो ब डपु आहे, उहो कहिड़ो आहे ?

माण्हूंअ खे इहो डपु ब थींदो आहे त मुखां गुरू, संत-महात्मा, माता-पिता ऐं वड॒नि जे वचननि जी अवज्ञा न थी वञे, शास्त्र ऐं कुल जी मर्यादा जे खिलाफ कुझ कर्म न थी वञे। हकीकत में इहो डपु त हुअण ब खपे छाकाण त हिन जे हुजण सां साधक सही रस्ते ते ऐं सही नमूने हलंदो।